Across The Lake Film Festival is with Општина Гевгелија and 3 others.

22 hours 49 minutes ago

Тони Наумовски по добиеното признание „Мето Јовановски“: „Преку езерото“ не е само фестивал, тој е магнет за светската уметност!

Наградата која ја доделува фестивалот „Преку езерото“, а го носи името на актерот-институција, Мето Јовановски, за 2026 година заминува во рацете на уметник кој со години го освојуваше Њујорк, за сега да го доживее најголемиот емотивен триумф – признанието од сопствениот дом.

Тони Наумовски вели дека првата мисла кога дознал дека е лауреат на наградата почувствувал изненадување, но и огромна чест и задоволство.

-Секое признание значи, исполнува, мотивира, обрзува и е привилегија посебно кога тоа признание доаѓа од дома. Мето Јовановски е голем мајстор кој што играше во лига на светски шампиони. За жал никогаш немав прилика да соработувам со него но секогаш уживам, се радувам и му се воодушевувам на неговите маестрални актерски остварувања.

Фестивалот „Преку езерото“ го слави медитеранскиот и балканскиот филм. Колку Дојран како амбиент и самиот фестивал се важни за вмрежување на македонските уметници со светот?

-Фестивалот „Преку езерото“ го слави медитеранскиот и балканскиот филм. Тој е исклучително важен фестивал. Дојран нуди атмосфера што спојува, вкрстува патишта на многу наши квалитетни колеги од регионот и пошироко, а точката на тој спој е токму фестивалот. Изминативе неколку години македонските уметници се маестралани и брилираат насекаде во светот, вели Наумовски.

И покрај успешната кариера во САД, редовно се враќате на проектите во Македонија. Колку е различно чувството кога создавате уметност на мајчин јазик, пред домашната публика која најдобро Ве познава?

-Тешко е да се опише во зборови како е да се игра на мајчин јазик. Постои една друга димензија. Буквите и зборовите на македонскиот јазик со нивното значење и музика носат своја индивидуална и колектвина меморија која патува низ вековите во потсвеста на секој еден од нас. Неизмерна чест, привилегија, одговорност и приоритет ми е да играм на мајчин јазик и што повеќе да сум дел од македонски проекти.

Која е Вашата порака до младите македонски актери кои во моментов Ве гледаат како инспирација и сонуваат за интернационална кариера?

-Стремете се кон совршенство. Бидете постојано подготовени. Работете на себе. Надградувајте се неуморно. Говорете ја вистината како на сцена, пред камера така и на улица. Станате човечки полиграф. Негувајте ја светлината во себе. Бидете она што Бог ви го дал да сте, извонредни, не просечни. Бидете точно она што сте, затоа што вие ни требате, а не имитација. Вие сте најважни со вашата посебност. Служиме на нешто што е поголемо од секоја наша индивидуална амбиција-делото. Никој ништо не ни должи освен самите на себе да сме секогаш подобра верзија од претходниот миг. Живејте во прашањата, не во одговорите. Немојте да живеете ниту со духовите од минатото, ниту во сенка на иднината, а „да бидете мигот“. Создавајте вечност со секој здив. Бидете љубопитни. Неограничени. Негувајте го детето во себе. Немојте да сте арогантни ниту лажно скромни. Слушајте ги сите, но чујте само неколку. Не се рециклирајте. Секоја улога има различен извор и свој единствен пат на трансформација. Играјте, немојте да глумите. Поддржувајте се едни со други и немојте да си ја продадете човечноста…
Тука сум секогаш за вас. Да ве заштитам, да ви се радувам, да ви се вооудушевувам. Прекрасни сте. Копајте длабоко. Со главата во ѕвездите, со нозете на земјата. Со благослов да биде сѐ што правите и сѐ што ќе наумите да правите.