Фестивалот „Преку езерото“ не е само филмска програма. Тој е простор за образование, развој на нови автори и создавање на идната филмска публика. Во рамките на неофицијалната програма ќе се реализираат едукативни работилници, студентски проекти и специјални настани посветени на иднината на филмот.

ДЕЦА НА БРОДОТ

И оваа година традиционално програмата ја започнуваме со селекција на филмови за деца и млади, каде секоја вечер ќе се одржува и „Игротилница“ – мала, но важна работилница за филмска и медиумска писменост.

Цел на програмата

• Да ги воведе децата во светот на филмот, творештвото и подвижните слики.
• Да им помогне да ги препознаат вистинските уметнички и образовни вредности.
• Да создаде нова филмска публика од најмали нозе.

Работилницата е едукативна и творечка. Преку игра и забава, најмладите учесници ќе имаат можност да создаваат краток филм и да се запознаат со секој сегмент од процесот: сценарио, продукција, актерство, камера, монтажа, музика и дизајн.

Работни групи

• Група 1: учесници од основни училишта.
• Група 2: учесници од средни училишта.

Филмски слотови

Слот „КИДАНИМА“

• Анимирани филмови со синхронизација на македонски јазик.
• Наменети за деца од 2 до 7 години.
• Забавни, дидактични и образовни содржини.

Слот „ТИН-ТИН“

• Долгометражни играни филмови за млади.
• Наменети за тинејџери од 10 до 14 години.
• Филмови од Балканот и Медитеранот кои ретко се прикажуваат во Македонија.

Пред проекциите ќе има панел за децата и младите во светот на проблемите на возрасните, а по проекциите Детското и Младинското жири ќе доделат награди за најдобрите.

НОВИ БРАНОВИ

„Нови бранови“ е работилница за развој и продукција на студентски и дебитантски кусометражни играни филмови.

По успешното минатогодишно издание, фестивалот продолжува со поддршка на младите филмски автори, студентите и дипломците кои ги подготвуваат своите први професионални филмски проекти.

Категории

• Дебитантски кусометражен игран филм.
• Дипломски кусометражен игран филм.

Учесниците ќе работат со професори, сценаристи, режисери и продуценти кои ќе им помогнат да ги развијат и дефинираат своите идеи во готови филмски проекти.

Победниците ќе добијат грантови во парични средства, филмска техника и услуги во продукција и постпродукција, со цел нивните филмови да добијат професионална реализација.

ХРАБРИОТ НОВ БРАН

„Храбриот нов бран“ е програма посветена на најновите достигнувања во вештачката интелигенција и нејзината примена во уметноста и филмската индустрија.

Програмата ќе се организира во соработка со МЕДИА програмата, Креативна Европа и Академијата Бреинстер. Предавачи ќе зборуваат за современите искуства, практичната примена и идните можности на вештачката интелигенција во филмот.

Теми

• Вештачка интелигенција во пишување и развој на сценарија.
• Креативност и нови технологии.
• Иднината на филмските професии.
• Примена на AI во филмската продукција.

Работилницата ќе се одржува во Дојран, а предавачи ќе бидат инженери и креативци од Македонија и од Балканот.